အတုမဲ့ မဟာကရုဏာရှင် ရှင်တော်မြတ်ဗုဒ္ဓသည် ရဟန်းသစ်
အရှင်အင်္ဂုလိမာလနှင့်အတူ မိမိသိတင်းသုံးရာ သာဝတ္ထိပြည် အနာထပိဏ်(နာမည်ရင်းသုဒတ္တ)သူဌေးနှင့်ပုညလက္ခဏဒေ၀ီတို့ စိတ်တူကိုယ်တူ ဆောက်လုပ်လှူဒါန်းအပ်သော ဇေတ၀န်ကျောင်းတော်သို့ပြည်လည် ရောက်ရှိ၍လာပေပြီ။
သာဝတ္ထိပြည့်ရှင် ဘုရင်ကောသလမင်းကြီး၏ နန်းတော်တံခါးဝ၌ လူများစုံရုံးလျှက် အသံကျယ်ကျယ်နှင့်တောင်းဆိုသံများ ကြားနေရ၏
တောင်းဆိုချက်များမှာ ဘုရင်မင်းကြီးနိုင်ငံတော်၌
“ကြမ်းတမ်းသောသွေးစွန်းသောလက်ရှိသော သတ်ဖြတ်ညှဉ်းဆဲမှု၌ စိတ်စောနေသော လူထုအားသနားခြင်းကင်းမဲ့သော(လူစိတ်မရှိသော) အင်္ဂုလိမာလသည် ရွာကိုလည်းဖျက်နိဂုံးကိုလည်းဖျက်
ဇနပုဒ်ကိုလည်း ဖျက်ဆီးနေပါ၏၊ လူတို့ကိုသတ်ဖြတ်၍ လက်ချောင်းပန်းကုံးဆောင်ပါ၏၊နေ့နေ့ညည
ထိတ်ထိတ်လန့်လန့်နေရပါ၏၊ကျီးလန့်စာစား စားနေရပါ၏။
လူထုလုံခြုံရေးအတွက် အရှင်မင်းကြီးသည်လူဆိုးကြီး
အင်္ဂုလိမာလကိုတားမြစ်ပေးတော်မူပါ”ဟူ၍ဖြစ်၏။
ကောသလမင်းကြီးသည် မင်းဖြစ်သော်လည်း ပြည်သူကိုလေးစား၏၊ပြည့်သူ့စကားကို အရေးထား၏၊ထို့ကြောင့် ပြည့်သူဆန္ဒ ဖြည့်ဆည်းပေးရန် ဆုံးဖြတ်လိုက်၏။သို့သော် ကောသလမင်းကြီးသည် အင်္ဂုလိမာလကိုကြောက်၏ လန့်၏၊
ထိပ်တိုက်ရင်ဆိုင်ရန် ၀န်လေးနေ၏၊ အကယ်၍ မသွားလျှင် မင်းကြီးသည် တာဝန်ကိုရှောင်လွှဲသူဟု လူထုတစ်ရပ်လုံးက ကဲ့ရဲ့ကြပေလိမ့်မည်။ အကယ်၍ သွားပြန်လျှင်လည်း မင်းကြီးဆက်၍ မတွေးဝံ့တော့။စိတ်၏ထွက်ပေါက်နည်းလမ်းစဉ်းစားရင်းမင်းကြီးသည်
အကြံတစ်ခုရသွား၏။ထိုအကြံအတိုင်းအကောင် အထည်ဖေါ်လေတော့သည်။ကောသလမင်းကြီး၏အကြံမှာ
ရှင်တော်မြတ်ဘုရားထံအရင်သွားမည်၊ဘုရားရှင်သည် တမလွန်စီးပွါးကိုသာညွန်ကြားသည်မဟုတ်၊ပစ္စုပ္ပန်စီးပွါးကိုလည်း
ညွှန်ကြားတော်မူ၏။ မြင်းတပ်နှင့်တကွလာသည်ကို မြင်သောအခါ
ဘယ်သို့ သွားမည်နည်းဟုမေးတော်မူလိမ့်မည်၊ ထိုအခါ မိမိမှ လူဆိုးကြီးအင်္ဂုလိမာလကို နှိမ်နင်းဘုိ့ပါဘုရားဟု လျှောက်ထားမည်။
မိမိနိုင်မည်မြင်တော်မူက ဘာမှဆက်မိန့်တော်မူလိမ့်မည်မဟုတ်၊ မိမိရှုံးနိမ့်မည်ကို မြင်တော်မူလျှင်ကား“လူဆိုးကြီး အင်္ဂုလိမာလထံ သွားခြင်းဖြင့် သင်မင်းကြီးဘာအကျိုးရှိအံ့နည်း”ဟု မိန့်တော်မူလိမ့်မည်၊
ထိုအခါမိမိက တပ်ခေါက်ပြန်ရုံသာရှိတော့သည်၊ လူထုကလည်း မဟာကရုဏာရှင် ရှင်တော်မြတ်ဘုရားကတားမြစ်၍ မသွားဖြစ်ကြောင်းသိက မိမိအားကဲ့ရဲ့ပြစ်တင်ကြလိမ့်မည် မဟုတ်တော့။နေ့မွန်းတည့်ချိန်ဖြစ်၏၊ ကောသလဘုရင်မင်းကြီးသည် မြင်းစစ်သည်တော်ငါးရာနှင့်အတူ ဇေတ၀န်ကျောင်းတော်သို့
ဦးတည်၍ သွားနေ၏။ကျောင်းအရံဝ၌ မိမိစီးနင်းသော
ယဉ်ပေါ်မှဆင်း၍ ခြေကျင်သာလျှင် မြတ်စွာဘုရားထံချဉ်းကပ်၍
ရှိခိုးလျှက်သင့်လျှော်ရာ၌ လက်အုပ်ချီလျှက်ထိုင်နေ၏။
(သင့်လျှော်ရာဟူသည်-ဘုရားရှင်နှင့် ဝေးလွန်းသောနေရာ နီးလွန်းသောနေရာလေညာဖြစ်သောနေရာ မြင့်သောနေရာ ရှေ့တည့်တည့်နေရာ နောက်တည့်တည့်နေရာတို့မှ လွတ်သောနေရာကိုဆိုလို၏)
စကား မစသော ကောသလဘုရင်မင်းကြီးကို ရှင်တော်မြတ်ဘုရားကစကားလမ်းကြောင်း စပေးလိုက်၏ စမေးလိုက်၏၊“မင်းကြီး သင်သည်မဂဓပြည့်ရှင် သောတာပန်ဖြစ်သော ဘုရင်ဗိမ္ဗိသာရကို အမျက်ထွက်၍စစ်ချီလာသလော၊ ဝေသာလီ
လိစ္ဆ၀ီမင်းတို့ကို အမျက်ထွက်စစ်ချီလာသလော၊ တစ်ပါးသော ရန်သူတို့ကို အမျက်ထွက်၍စစ်ချီလာသလော”ဟု(လာရင်းကိုိ သိသော်လည်း)မေးတော်မူလိုက်၏။တပည့်တော်သည် ဗိမ္ဗိသာရမင်း လိစ္ဆ၀ီမင်းနှင့် အခြားသောမင်းတို့ကို အမျက်ထွက်၍ စစ်ချီလာသည်မဟုတ်ပါ။ အမှန်အားဖြင့် တပည့်တော်၏ တိုင်းနိုင်ငံအတွင်း ဆိုးသွမ်းနေသော လူဆိုးကြီးအင်္ဂုလိမာလကို နှိမ်နင်းရန် သူနေထိုင်ရာဖြစ်သော ဇာလိယတောတန်းသို့ သွားမည်ဖြစ်ကြောင်းလျှောက်ထားလေ၏။ရှင်တော်မြတ်ဗုဒ္ဓက- ဆံမုတ်ဆိတ်ကိုပယ်၍ ဖန်ရည်စွန်းသောအ၀တ်ကိုဝတ်ရုံလျှက် မြင့်မြတ်သောရဟန်းဘောင်သို့ဝင်ရောက်ကာ“သတ်မှု ခိုးမှုလိမ်ညာမှုတို့ကိုရှောင်ကြဉ်၍ဆွမ်းအာဟာရကိုတစ်ထပ်သာ
ဘုဉ်းပေးကာဓုတင်အမြတ်တရားကျင့်နေသော(မောက္ခဓမ္မကို ရှာဖွေနေသော)အင်္ဂုလိမာလကို အကယ်၍မြင်တွေ့ခဲ့လျှင်” အသင်မင်းကြီး အဘယ်သို့ပြုအံ့နည်းဟု မေးခွန်းထုတ်ကြည့်၏။
ဘုရင်မင်းကြီး၏စိတ်ကို သွေးတိုးစမ်းသည့်သဘောဖြစ်၏။
သုံးလောကထွဋ်ထားရှင်တော်မြတ်ဘုရား တပည့်တော်သည် ကြမ်းတမ်းဆိုးသွမ်းသော အင်္ဂုလိမာလရဟန်းအဖြစ်နှင့်အကယ်၍ တွေ့မြင်ရပါမူထိုအရှင်ကို ရှိခုိုးမှု ခရီးဦးကြိုဆိုမှု နေရာထိုင်ခင်းပေးမှုလည်းပြုပါမည်၊ထို့ပြင်“စား ၀တ် နေရေး ကျန်းမာရေးအတွက်”ဆွမ်းသင်္ကန်းကျောင်းဆေး ပစ္စည်းလေးပါးလည်း လှူဒါန်းပါ့မည်၊လိုအပ်မည်ဆိုပါက ထိုရဟန်းပြုသွားသော အရှင်အင်္ဂုလိမာလအတွက်တရားသဖြင့် ဖြစ်သော လုံခြုံမှုကိုလည်း တာဝန်ယူဆောင်ရွက်ပေးပါမည်ဘုရား။သို့သော် ကုမုဒြာသည် နေနှင့်ထိက ပွင့်ချင်ပွင့်ပါမည်၊ ပဒုမ္မာကြာသည်လရောင်ကြောင့် ပွင့်ကောင်း ပွင့်ပါလိမ့်မည်၊ ရက်စက်ဆိုးသွမ်း ကြမ်းတမ်းသော အင်္ဂုလိမာလသည်“ကိုယ်နှုတ်လွန်ကျူးမှု ၀ိတိက္ကမကိလေသာကို သီလဖြင့်၊စိတ်ထဲ၌ ထကြွမှု ပရိယုဋ္ဌာနကိလေသာကို သမာဓိဖြင့်၊ ခန္ဓာ၌ကိန်းနေသော(အာရုံနှင့်တွေ့မှ အကြောင်းတိုက်ဆိုင်မှ ပေါ်ပေါက်လာတတ်သော)အနုသယကိလေသာကိုပညာဖြင့် ထိမ်းတော်မူကြသော“ရဟန်းဘ၀ သမဏအဖြစ်”ခံယူခြင်းမှာတော့
ဖြစ်နိုင်ချေမရှိပါဘုရားဟု ကောသလမင်းကြီးသည်
ပြန်လည်လျှောက်ထားလေ၏။
(အရှင်အင်္ဂုလိမာလ ရဟန်းပြုသွားသည့်သတင်း လူထုအတွင်းမပျံသေးပေ)။ဘုရားရှင်၏ အနီး၌ အရှင်အင်္ဂုလိမလာထေရ် ရှိနေ၏၊ သို့သော် မင်းကြီးသည်မသိ၊ မင်းကြီးသာမက အခြားစစ်သည်များလည်း မသိကြပေ။
ရှင်တော်မြတ်ဘုရားသည် လက်ယာလက်ရုံးကို မြှောက်ချီတော်မူ၍ ပေဿနဒီကောသလမင်းကြီးကို“မင်းကြီး အင်္ဂုလိမာလဟူသည် ဤသူတည်း”ဟု မိန့်ကြားတော်မူလိုက်၏၊ထိုအခါ…(ဆက်ရန်)
ကောင်းသစ်
No comments:
Post a Comment